wó nas

Witajśo na webbok projekta Serbskego šulskego towaristwa z.t., wudawaŕ a zagronity za wopśimjeśa toś togo boka.

W pilotowem projekśe smy zestajali prědnu zběrku drogowańskich sćažkow, z wósebnosću, až wóni wobglěduju pótrjeby wucabnicow a wucabnikow. Jadna se wó wótwórjony projekt, t. gr. kuždy cas daju se nowe drogowanja pśidaś.

Drogowanja wjedu was pó sedleńskem teritoriju Górno- a Dolnoserbow we Łužycy. Nazgónijośo a nawuknjośo how něco wó Łužycy a wó Serbach, jich stawiznach, rěcy a kulturje.

Drogowańske naraźenja maju wótglěd, cytarja pógónjowaś, Łužycu drogujucy aktiwnje dožywiś. Mimo togo ma zběrka wucabnicam a wucabnikam byś pomoc pśi planowanju swójich drogowańskich dnjow ze wuknikami a jich inspirěrowaś.

Kuždy, kenž co nowu drogowańsku sćažku zestajiś, togo lubje witamy. Daś se na nas wobrośijo.

Projekt spěchujo Załožba za serbski lud, kótaraž dostawa lětnje pódpěru z dankowych srědkow na zakłaźe góspodaŕskich planow, kótarež su Nimski zwězkowy sejm, Krajny sejm Bramborskeje a Sakski krajny sejm wobzamknuli.